ســايــق عــلـيـك

سايق عليك الهوى
ياقلبه ف ضلوعه
انا اللى قلبى ارتوى
ف مجيه ورجوعه
لتفكره بالدار
وبعشق لف ودار
وبشوق معاه احتار
ما خرجش من طوعه
سايق عليك النبى
وصله مراسيلى
قلبى ملاه الجفا
والعشق طول ليلى
يجى بأول ندى
قلبى الجريح اهتدى
يسمع لقلبى الصدى
وتغنى مواويلى

جوايا قلق

جوايا حبة قلق
بكرة هروح وهنتخب
وهياخدوا صوتى ع الورق
هجيب رئيس من غير قلق
ولا احنا شعب للعذاب بيتخلق

جوايا كتير كلام
وخوف من الايام
لتتبسم للحظة
ونرجع للى كان
عبيد تتهان
او بيادة للاخوان

ســوء فــهـم

كنت حاسة انى شايفة
انى فاهمة شراع هواه
كنت فاكرة انى خايفة
عشقه يوصل منتهاه
كان حقيقى يبان وواضح
عشنا يومها احلى كدبة
ارقى صيغة للحياة
قولنا بحر كلامنا شعر
دوبنا فى معانى الكلام
قلت كل الشعر فيه
وهو شعره ما كنش ليا

قــلـب ســاعــة

 

انا قلبى ساعه ودقتها
ف اليوم يجى ستين دقه
انا اصلى الدقه بتيجى عندى
مع اكتر من ستين نبضه
بقى صعب تحسبها
م الوقت للتانى
بتقل وبتكتر
لو غبت عن بالى
بتزيد مع وجودك
وتضيع ف ملكوتك
اظبطها وحياتى
على ساعه ف ضلوعك
اظبطها وحياتى
على ساعه ف ضلوعك

ثـــورة لـلأمــام

طار الحمام وفرد جناحه
اصل الحمام رمز السلام
عشش معانا رجعلنا
غنى الحمام والشوق كلامه
بس الحياة قلبت غناه
شايف الوطن من فوق حزين
سحل ومهان
حرق المصانع
حقه اللى ضايع
شاف العلم
غرقان بالوانه التلاتة مع السواد
والنسر مال
كسروا جناحه
ناح الحمام
حلمه اتنهب
ضاع بالسلامة
خابت اماله
لكن ما ضاع
ثار اللى ثار
ثورة ونار
قال للامام
رفع العلم