ترزى فــ العشق

خياط فـ العشق
يستاهل تنشك ايديه
ترزى وبيفصل
فــ الثانية مشاعر
ويظبطها كأنه الأصل وسانيه
بمقصه الحامى بيقصقص

من توب كدبه
وبخيط ملضوم فـ الإبرة
يوصل الأقصاقيص بإيداه
والناتج منهم حَبكة
تدوب ألواح التلج عليه
مش فارق عنده القالب
الفارق صُنع ايداه يلمع
وتتلهف عليه القوالب

مـر طـيـفـك

مـر طـيـفـك فـى مـنـامـى
قـمـت ورديـت الـسـلام
ياللى ليك كانت أحلامى
قلبى بيك دايما سهران
تفتكر لو قلبى شافك
روحى راح تقدر تنام

غرد العصفور وصحى
شوقى ليك قبل الأوان

شوق جارف

لا بنتحايل ولا نتمايل
ولا بنعبى قصايد شعر
شوقنا الجارف هو الحالف
يقلب كل قصايده لـ فعل

وكأن الحال كاذب

بدل ما يهدى الــ وجعنا
سبنا وبعنا من غير اعذار
بدل ما يصفى الــ مالينا
شك وحيرة وحبة غيرة
سبنا لأفكارنا بتوجعنا
وبترجعنا لسكة مشوار

مشيناه لعنيه وبنتحالف
ما يفرقنا ولا يجرحنا
شوقنا الجارف
وبيتعاجب
حالنا وكأن الحال كاذب

عازف , شاعر , فنان

انا ساعات بكون انسان مجنون
وساعات مهموم وكتير ولا حاجة
وساعات بكون انسان قوى
ملو الهدوم
اوقات من ضعفى بنكسركسرة قلم
وكتير بموت من الالم وكتر الهموم
يحمر وشى ويتلون فى عز كسوفى
وفى الحق اكون حاسم ومش كداب
وبضحك اوى وبزيادة بقلب حزين
واموت من الضلمة والغيمة
وعتمة ليل
واحب ساعة صبح بتشرق شمس النيل
واعشق فى الفجر ريحه وندى بيسقى الورد
ولون البحر وريحة الملح فوق طين
بكون عازف
واكون شاعر
واكون رسام
مانيش جاحد
مانيش فاقد
ما نيش اوهام
تتوه التوهه بين نفسى وبين روحى
والمم نفسى واجمعها
تُرد الروح
واخاف من اللى يجرحها
واخاف م الموت
واصرخ بعلو الصوت
انا الموجود
وتوصل وبصدى نغمها
لأعلى حدود
انا الموجود
هعلى الضحكة بشراعها
واعدى البحرولو سكة موت
واعيد للمرسى بَحارها يرسيها
فى ارض الكون

ضى عينى

ما تسحبوش من عنيا الضى
وما تقولوش مثلى ماله زى
وما تحسبوش التوهة وخدانى
دا انا فرعى اصلى حبه ماله زى

مرسوم سكتك

ايه اللى يخلى قلبك فيك
مهزوز وخايف م الراحة
اما اباحة رفض الأحساس
حتة تناحة
لأ انسان عجب
موزون ومتاقل دهب

طب ليه القلق
كان ايه اللى ناقص فـ الطلب
الــ بوجوده بتكتمل
وكم حرف فيك لا يحتمل
مطلوب تراجع خطوتك
نور سكتك محتاج طرب
لم الاتى والنوت
واحفظ مكانك مايسترو
وسط الميدان
وبلحن انشودة الجمال
افرض وجودك ع الملأ
واياك قلق
وامسك مشاعر خطوتك
واعزف بها وسط الميدان
واياك كمان
من ناس لئام بيزيحوا
مرسوم سكتك