فهمت من السكات

وفهمت من السكات انه
فارق حبنا كانه
لآعدى علينا ولا هدى
ولا عيونى بيه اتحنوا
ولا زماننا بيه اتغنى
ولا القلب بيه اتهنى

روحنا وجينا وكأن
خيال من ضى نورله
وزى ما اكون ولا فارق
عيون تشتاق وبيحنوا

قلب بشريطة

فاضية ومشغولة
ساكتة وبتكلم
صاحية ونايمانة
قلبى ومصمم
يعملك زيطة
وفـ جنبه شريطة

تفتحلك باب
قلبى البواب
لمكانك فاضى
يعملك قاضى
متحيز ليك
ما فيش غيره شريك
يتحكم فيا
أحكام قضائية
واخدة العرفية
لجناب معاليك
والكلمة ديه ليك
املُك بإيدك
أوضة وتمليك
ولا قصر مؤجر

صـورة لـلـحـرمـان

امـتـى كـنـت لـيـا عـادى
امتى سبت مكانى فاضى
دا انت يوم ما تبقى عادى
ابــقـى مـُت مـن زمــان
بطل خاوتة وشغل جنان
وجع القلب ده يبقى سعادتك

بـطـل تـنـكـش فـى الـكـتـمـان
قـلـبـى وكان بوجودك راضى
خـايـف يـخـسـر حـبـك كان
كـل كـلامـك بـايـن راضـى
نـرسم صـورة لـلـحـرمـان

بياع شعر

بيبيع الشعر فــ الدواوين
وادور عـلى اللى يقراها
بعلو الحس اقول يا مين
يـبـيـن ســر فـحـواهـا
وبـلـزق صورة بالأفكار
يـسـطـر سـطـر جواها
وسطر وسطر يبقى البيت
وتـكـمـل صـورتـى وياها
واقول يا غازل الأحلام
نور فكرى فى سماها
يوازى الفكر لـــ دقات
يسيح الدم ع الكتابات
حروف تترص فــ الكلمة
وتطلع جملة ورا جملة
تـبـان الـفكرة وتـَبـيـن
صراع القلب والدقات
ويجى الشارى يقرانى
ويـفـهـم كـل اسـرارى
ويعرف حلوىِ ومرارى
ويكشف جوه قلب الذات
بَمَس حالته كتير اوقات
وبـبـقى مـرايـة افـكـاره
وأقـلـب فـكـره بالأبـيـات
يتوه ويبات فى السارحة
ويلعن حسى كتير اوقات
ما انا جددت اوجاعه

اوعدك

اوعدك وان كان يكون
اكون بهواك مفتون
وتبات فــ نن العيون
وتغطيك الرموش
البرد عليك تحوش
والبعد بينا حاير
يطل وما نطولوش

لجام الحزن

الحزن فك اللجام
لم لحبايب كلهم
بـعـد الأدان
سـاعـة الـصـلاة
رحـمـة ودُعـا
وغـيـام فـ عـين مـتـشـوقة
لـو كـان يـَطَـول فــ الـلُـقى
لـو كـان بـقى حـافـظ وصال
كـل الـلـى فـارق دُنْـيـتـه
لـو راجـعـته تـانـى الحياة
كـانـت اكـيـد اتـغـيرت
فـيـه نـظـرتـه

الـذكريـات

وسرحـت الـذكريـات بـيـنـا
مـن ربـيـع ورود ع الـخـد
لـبـرد الـشـتـا فـوق الأرض
تـتـمـايـل وتـمـرجـح فـيـا

كل ما بدعى

كل ما بدعى يا رب ادينى
القى لسانى وكل ما فينى
يدعى بكل الـلى اتـمـنـاه
حتى شفايفى حافظة دعاه

مالوش بديل

هعيش حياتى وقلبى جنبك
ولو فكرنى انا هرضى بعدك
عشق حتى ولو بـــ ضمير
يبقى فيا ما خدش راحته
قلبك ولا شافش الدليل
وع الوصية هوصى قلبى
غيرك انت مالوش بديل

كلمة حبك

كلمة حبك ما تسبهاش
عيدها وقولها ما تستناش
تضمن مين يسبق معاليك
يدخل جنة وما تشفهاش

مغلوب على أمرى

يا رب قلبى اكتفى من ذنبى دارينى
شارخ حيطانى جفا والعشق مالينى
يا رب انا المحتاج اكمل فى تكوينى
يكون لقلبى صفا م العشق يروينى
شايل هموم الـوفـا للـمـوت يـوديـنـى
يا رب انا المغلوب على أمرى رسينى

 

صورة للحرمان

امـتـى كـنـت لـيـا عـادى
امتى سبت مكانى فاضى
دا انت يوم ما تبقى عادى
ابــقـى مـُت مـن زمــان
بطل خاوتة وشغل جنان
وجع القلب ده يبقى سعادتك
بـطـل تـنـكـش فـى الـكـتـمـان
قـلـبـى وكان بوجودك راضى
خـايـف يـخـسـر حـبـك كان
كـل كـلامـك بـايـن راضـى

نـرسم صـورة لـلـحـرمـان

وفــ ليلة سبعة وعشرين

وفــ ليلة سبعة وعشرين
بدعى تكون فــ حياتى أمير
وانا جنبك نجمة وحيرانة
من سحرك شاردة وهيمانة
مـا تـأمـن وتـقـولـى اّمـيـن

هَـل الـقـمـر

على بسمتك هَل القمر
ونسمت نسمة ربيع
واتخضرت لون الشجر
واتفتحت شبابيك لقلب
وزقزقت عصافير بلون
ضحكة قمر
بين السطور تاهت بحور
شعر وشطور
يحلى السهر
توصف فــ عين
تلمع جفون
توصف فــ قلب
تعشق تحب
ولا الملامح
سحر وشجن
الله عليه لما بإيديه
بيفيض حنان
يرسم هَنا
ويعَلى المُنى
للمس الأيدين السرحانين
وسط الملامح
والقلب جانح بجناح الطير
يجرى يطير
زى العصافير بين الشجر
واما القدر سماه حبيب
ما بقاش يعيب
ليل السهر

فى عز دقاته سكت

فى عز دقاته سكت .. !!

ومبقتش عارف ..
زى كل مرة وهاتفوت
ولاهو خلاص بيموت

خايف يكون كان السبب
ما كنش قصده يتسكت
مُناه يعيش عيشة ولد
وسكته نبح الصريخ ..

وكل طريق فيه شوك مزروع
وكل مايشبع مـ الحب يجوع .
دقة تشكى ودقة تبكى .
ودقة صوتها صوت موجوع . !!

وخوفى اقوى ع الولد
لساه حزين كيف الكمد
وجوا منــُه فيران سعرانة
بيعلنوا حالة قلق ..

القلب فجاءة خلاص وقف
والنبض رافض الرجوع .
والعمر زى مايكون حلف .
رجوعُه الدُنيا خلاص ممنوع  

ارتجالة مع محمد إنسان

ايادى وشوش

ايادى كتير شبه ناسها
ايادى توصف احساسها
فى ايد منقوشة بالحنة
وايـد بــ زمنها تتـحـنى
وايد مشقوقة بالـعـفة
وايد طولانة بـالـخسة
فى ايـد تتمد بالـراحـة
وايـد تـمـتـد لـلـطاعة
وايـد للـمـولى تتـرجى
وشوش الناس شبه ايدها
بتتحنى مشقوقة طولانة
ايادى وشوش بتتهجى
لسكة تشبه اخلاقها

بحبك يا شاعر

اقولك يا شاعر
لمست المشاعر
بمقطع وبيت
وقافية قصيدة
تهز اللى ساكن
فــ جنبى الشمال
ورغم احتمال
برودة مشاعرك
هقرب و اخاطر
وادوس فــ المخاطر
واجرب واشوف
ما يمكن تجاوب
وتبعت تهاود
قلبى ببيت
ربعاية فالتة
وهعند شوية
صنعة تقيل
وترجع تهاود
وهرجع والين
ونحكى الـ كامن
فـ قلب الحديد
واقولك اكيد
بحبك يا شاعر

ختيارة فى حالة

علمونى البنت هيبة
بتستحى والكدب خيبة
والتُقل طبع الأميرة

والذليلة بتبقى أُلة
عرفونى الحب عـيبة
والحبيبة بتبقى قُلة
نشرب منها بَل ريق
نفتكرهاعطشانين
والنداشا ويا نداشا
لما تهوى وتبقى مازة
الحريقة بتبقى فازة
والمطافى بتبقى زحمة
فأعذرنى كنت رخمة
جوه منى الفكر زحمة
وخايفة من لسع الحريق
لو كلامى كان مضايقك
اعتبرها فيا عيبة
خد فـ وشك يلا غيبة
و سد وياك الطريق
ولو حبابنى هتبقى ميزة
وتهدم بينا اى سد
يلا قرر حط حَد

ولا كأنك هنا قلبى

يا دى الغيبة
يا دى العيبة على قلبى
يعذبنى يغلبنى
على غيبة ماهش منى
يا دى الغيبة الــ وجعانى
ما قولنا خلاص
ما فيش تانى
لا تهوالى ولا تحبى
كلام يتعاد
ميييت مرة
ولا مرة معاك بيفيد
تصد الحب وتدارى
فــ أول غيبة لعنيهم
بيحلى لك تسهرنى
تحيرنى
وكأنى ما نيش منك
ولا كأنك هنا قلبى
يا دى الغيبة
يادى العيبة
على الدمعة تصغرنى
وتأسرنى
لندا عنيهم
وتجبرنى اطاوعهم
واغنيلهم مواويلى
فدى الراجعة
كده يهدى
ويتنظم فــ دقاته
ودا قلبى
وديه حياته
وانا الطفلة الــ مكسوفة
من الشيخة الــ جوايا
وكده كفاية
لا انا ملاوعة
ولا العيبة بترضينى
أنا طالبة
نهاية تليق بتكوينى

بلد العُجاب

بلدى دى بلد العجايب
اللى حاضر واللى غايب
أسم فــ شهادة ميلاد
موته ما يهم البلاد
حقه دايما عنه ضايع
والسواد بقى زى رسمى
الولاد شهدا وأيادى
بلطجية بزى مخفى
تضرب الطلقة فــ وادى
تستخبى وتستخفى
بدم نازل ع التراب
بلدى يا بلد العُجاب
ليه جناين الورد زادت
ع العباد الحسبه ضاقت
اّلة حاسبة جوا منهم
خربت بفضل الحداد
عيشة اسود من السواد
عارفة بكرة تنسى اسمى
تنسى حامى للبلاد
تدعمى أبو زى رسمى
راعى جنازات الولاد
 

خلق عَلب

الخلق علب ودواير
على كل شكل ولون
خلق من نظرة تبنيك
خلق م التانية تردمك
خلق فى الصعب ترميك

وخلق بتقوى مَركَبك
وخلق عَلب صفيح
بهاريز الاصل جواها
وتفيد فى ايه العلب
واتفضى محتواها
فى منهم علب أزأز
مكشوفة نواياها
ومنهم علب بلاستك
ذمة وضمير بأستك
الصين صنعاها
ومنهم فتارين بلومض
سانيه فى لمعتها
صورة وتلميع جلانس
والقطنة فضحتها
وخلق علب كرتون
تشربها بالشليمون
والمادة حفظاها