يناير

يا اوائل الشهر البديع
هَلي و رفرفي
محتاج انا م الامل دليل
ان السنة جاية..
يناير بداية الجديد
و السنة ديا ..
ليا أمل وحيد
الفرح فيه هدية
ندر عليا و دَين
لاكتب لها مواويل
و افرشلها بساتين
مبدورة بالدواوين
في عشق طالتها
و أمٌر بشهورها
باحث علي أملي
و مش هشيل همي
كمان سنة جاية
يناير ..
في ناس مستنياك
بحاجات كتير عايزها
حققلها مٌناها ..
طبطب علي التايهين

مالك حياتى

هو كان مالك حياتي
نور زماني عهد جاي
اللي ادي لبكرة قيمة
اداني فكرة قلبي حي

صوت الرصاص

 

عالوا اصوات الرصاص
اعلي من صوت الحناجر
و كل ما يزيد الصريخ
يزيد عليه كَم الرصاص
الكَم مش محدود ..
و الصريخ ما بيوقفش
و الدم ملا الشوارع
و الحاجة قاتلة الناس
مش محتاجين لرصاص
ميتين .. ميتين ..
باسم الثورة .. باسم الدين
معدودين من الاموات
و البيه ابو ناب طويل
قافل لنور عنيه سكك النجاة
الخلق جاعوا ..
و الجعان هزيل ..
ما بيبنيش وطن

تراهنينى تحبينى

جه بص بعند في عيونها
و ركز نظرته عليها
و راح و بـ لهفة يسألها
تراهنيني تحبيني .. ؟!
خدها كسوفها ثبتها
ما عرفت كلمة تنجدها
و تاه النني في عنيها

ضريبة العشق

ضريبة العشق الوجع !
ريهام أحمد 

و كل عاشق اخره ضلمه
و ليله رهبه و عمره ثانيه
ان كان حبيبتي كل عشقه ( مصطنع )

محمد جاد

بالذمة برضه ده يرضي مين
بندوب حنين
ونموت حزانى م الالم
بدموع خادتنا كالوطن
ع الخد رافعلنا علم

محمود مراد 

 الذنب سوء الاختيار
وان مصيرنا نعيش في نار
يبقي بنصيبنا من الوجع
نوجد لبكرة ١٠٠ نهار

 ريهام أحمد

نوجد لبكرة ١٠٠ نهار
ونعيش حياتنا من سكات
بقلب ينبض بالوجع
ويسقى كل الانسجة ..طعم المرار
وعيون بتحكي للودع
خليك جدع
وهاتلي بكره سكره
وروح بترفض الاحتضار

 محمود مراد

 

ذكرى منسية

انا البنت الـ تتراضي
بكلمة و همس حنية
انا البنت الـ هونت عليه
عشان بترضي بهدية
انا اللي ما هنش عليها يوم صده
و صده لقلبي بقي غية
انا اللي تعبت من بعده
و قربه يا دوب مداديا
و بتصبر بكام كلمة
و كام ذكري من الحلوين
لكني خلاص فاض بيا
لا قلبي بيرضي بعناده
ولا بعاده وجع ليا
و خدنا خلاص انا و قلبي
نعيش و الذكري منسية

ما بقاش هو

الكلام بقي بينا عادي
المشاعر متدارية
و اللي باين منا جايز
فيه يا دوب حبة حنية
السكات اسلم قضية
الفؤاد واقف مرصرص
عايزله حتة متدفية ..
كل شئ جوانا جامد
سبنا روحنا كتير مرمية
و النتيجة كله عادي
كله متجمد قصادي
قاسي قلبك..
اقسي من برد الشتوية

ايدى الفاضية

جاية و راجعة بأيدي الفاضية
بأبني حياة جديدة لـ قدام
كل طموحي تكون مرتاحة
صافية و هادية زي زمان

بنحبك يا ثورة

و بنحبك يا ثورة بجد
و مهما تعملي فينا !
بنصحي بشوق نبوس الارض
و ضي دموعنا في عنينا

سجادة عشق

مابقاش هو ..
اللي شالني في نن عينه
من جوه ..
اللي فكري سهران
يبعتله فـ رسايل
و مهما قالوا عليه
ما بيصدقش غيره هو
ما بقاش يخليني افكر
غير ليه بيبعد ..
و ليه أتأخر ..
و ليه سؤالي ما جاوبهوش
و ليه تمالي بيعتذر
و يرجع من تاني يتاخر
ليه تمالي حاجة ناقصة
طب ليه بيسحب نفسه مني
لو كان قلبي صحيح مقصر
طب كان يقولي..
و انا كنت فرشت ضلوعي اكتر
سجادة .. تحت مداس رجليه

طعم النهار

مشتاق لطعم الصبح بين ايدك
و الضحكة الـ بتدادي و بتصبح
و روح قلبك ..
و رش حنانها في الطرقات
احساسي كأني واحد مات
يموت بنية اني هقابلك

طعم اللمة

انا مقسوم نصين
نصي العاشق كله هيام
نصي الخايف مـَ الايام
شايف ضلك زي خيال
ماشي وسايب ايدي الفاضية
ليك بتشاور ارجع امسك
و أوعي تفرط فـ الاحلام
يأسك مش هيداوي جروحي
غضبك مش هيسكت دمعى
أثبت وأدى عزيمة لقلبى
يكسر كل قصور الضلمة
نَدِى الشمس الفرصة اللامعة
تَظهر كل حروف الشوق
نرجع تانى انا وانت ندوق
طعم اللمة

بداية جديدة

في المرحلة الجاية
هفضي دولاب الخوف
 هريح قلبي مَ اللهفة
هحط كمان ترابيس
 علي قلبي و اتباعه
 هعلم بالي يستكفي
 بقوت يومه من النسيان
 هزيد من حرق اورقه
عشان الذكري
 باب مفتوح
  هتزحم شق سكتنا

في المرحلة الجاية
 هعيش لدماغي و بكيفي
 لا شيل في الهم ولا غيره
هرفع حالي فوق راسي
 و اكرم قلبي علي خيره
 و اوقف دعم احبابه
و ازيد من دعم دقاته

في المرحلة الجاية
 هرضي بحالي في الوحدة
 و اونس نفسي بكتابي
 و الم قصايدي في اللهفة
و اجندها عشان انسي
 هعرفها لفين ترسي
 حوريها الحنان ابيات
 و انغنعها في راحة البال
 و اقسيها علي اللهفة

 هكون نفسي ..
و احب الكامن جوايا
 و انا معايا أكيد هرتاح
 اكيد طبعا هنتفاهم ..
هنتحاور ..
و نتبادل ..
و نتجاذب ..
و نتنافر
 لكن أحباب ..
ما فيش بينا مكان لغياب

دنيا

دنيا ..
حالها كده ..
متسلطة علي كل اجناس البشر
و الحل فيها تحمده
خالق كريم ..
عالم حليم ..
بكل اجناس البشر
و تكبره جواك اوي
تخدم دقاتك عزته
ارضي بحالك و افتكر
حال الـ فاقد نعمته

و سام شرف

ما تغيبوش الحق
فى سجلات الحضور
ما ترسموش الضلمة
فى نهار طالعله شمس
ما تسلسلوش الطيرالحر
فـــ سما من غير قيود
الحق طالع و الباطل مالوش عُمر
ما تقفوش تشاهدوا السيل فى دمى
ما تسرحوش بعيد و تزيدوا همى
انا المقتول لجل ما تعيشوا بكرة أمان
ما تسخفوش حلمى
و ما تزيفوش أسمى
خالونى عبرة لكل من خان
خالونى لقمة فى زور القاتلين
و أمنحوا الحر فى اى مكان
وسام شرف يَشهد فى حقه سنين

ريحة الحنة

جربت تمحي الجرح
اتولد مية !
جربت طعم الفرح
علقم يا طعم الخوف
ما بين فرح وخوف
بتتولد ازمات
الحلو منك مات
الباقي مشروع ضل
تايه في قلب البوح
حروف تهرب و تقل
عشمان تدوق الجنة
مشتاق لريحة الحنة
و تبعدك مسافات
قربك يزيدك بـٌعد
روحك بتتعقد
و تتخلق افكار
عشان تنول الفرح
الغيبة ليك مطرح

اش الصيف

فى كام حاجة فيك ممكن تتدفن
عشان ما تكونش شاذ وسط الجموع
و يقبلوك أنسان قنوع
و يرفعوك فوق الرؤوس
كام حلم ساكن فيك يجوز
قدامه الف مستحيل
تََحتكم ايه من الدليل
ان انت واحد من البشر ؟
و ان فى وشوش الناس كلام
سايبة من الأثر جواك دليل
ان انت واحد منهم
و يمكن كمان احسن
احسن من كتير زيهم
ممكن كمان تكون ضعيف
زى اشة فى ريح الصيف
طارت لأبعد ملحمة
دور جواك ع النواقص
سبقوك كتير بس الأمل ما بينتهيش
وان كنت اشة فى وسط صيف
اقوى عيدانك فى الشتا
يجى عليك الصيف كــ ضيف
عدى .. واهى كانت مرحلة

بستناك

بيريحني وجودك جنبي
وبيسعدني كلامي معاك
بستناك من قبل سلامك
و لحَد ما يجمعنا سلام

حلم

يا خلق..
انا ليا حلم كبير
لكن الله أكبر
و حلمي أصغر
من انه يستعصي عليه
ما تقفولش الباب في وشي
و ادعو ربي يبقي خير

طريقك مسدود

احنا اللى الحظ يجى قدام بابنا
يقولنا أخيى ما أدخلش !
نزق فيه و نحاول .. يمشى
نحايل فيه ونقول معلشى
يرد يقول .. معلش انا همشى
نرد حاول .. يمكن .. جايز
يقول طريقك مسدود
مسدود يا ولدى

مليت أعذار

ما زهقتش من الاعذار
مش حاسس نفسك بايخ
ماكرهتش نفس العذر
كل لما تغيب بتقوله
ما صعبتش مرة عليك
ماخدكش الشوق لعيوني
مليت كل الاعذار
مش هسمع كدبك تاني
اما انت عليك تختار
ان كنت صحيح بتحب
لتبطل تخلق عذر
لتروح بالكدب لغيرى
مش هسهر ليلى بعيط
و بَقلب فى الأفكار
و أنت ولا حتى فى بالك
تتطمن على الأخبار
مخنوق الشوق فى عيونى
ملهوف الدق فى قلبى
مرغوم بالغصب يخبى
عنك كل الأسرار
و كأن غريب بيحاوطه
مش عايز يكشف ستره
مليت منك اعذارك
وانت اللى عليك تختار

عيد الحب

انك تَعيد عـ الحبيب
مش غرضه ورد او دباديب
غرضه تحس الأهتمام
غرضه تقول خاليك قريب
دايما حبيب .. نبض الكيان
تخلق جواك حبة صور
تغفر ايام ما تكون بعيد
ذكري و قصاقيص حوار
تريحك وقت الضجر
و تزيد كمان حبل الوصال
قوة تتحدي الزمن
و بينعكس حبك كمان
علي قلب محبوبك اكيد
خليك حريص ..
علي كل ذكري تربطك
ويا الحبيب

إنسان كمالة

مش هعيش إنسان كمالة
مش هكون خواف جبان
مش هرضي أسمي في خانة
و حقي يكتبوه فـي ميدان

حلم

بحلم بوش
ما فيهوش تجاعيد الزعل !
وان كان لابد من الزعل
مطلوب حبيب يطيب دمعتي
ممكن قَريب ..
المهم انه يُجيد
مَحي الدموع من وحدتي

يا حلوة

يا حلوة زادوا عٌشاقك
دا عشقك بان علي قلوبهم
يا حلوة الكل مشتاقك
و شوقك قولي راح ع مين
يا حلوة الكل راد وصلك
ووصلك قولي رايد مين

حيرة

يا كتب العشق دليني
حبيبي غاوي يكويني
اقوله بجد انا مخصماك
ما يبعت رد يرضيني
بيوحشني ولا يسأل
ألومه يقولي مش فاضي
و يَتعب قلبي و يدادي
و يتمسكن ويتمايل
فـ قلبي عليا يتكاتل
تحن عيوني للنظرة
ويلحقني بـ وحشتيني
علي الحال ده كذا مرة
و نرجع تاني للجرة
دا لا بيهتم ولا ناوي
ما بيحَرَم ولا يسأل
حبيبتي ليه خصمتيني !

شوية أهتمام

علي اد حبك ..

زيد اهتمامك
ان كان غرامك

شئ مش اكيد
خالينا نحفظ ..

شوية مشاعر
ليوم لٌقانا ..

ارد السلام
خالي اهتمامك ..

زاد الغرام
تلزق فـ بالي ..

عشقي و حلالي
خاليني دايما ..

أول صباحك
اخر كلامك ..

مسك الختام