كلمة رب

انا اللي برغم كل عيوبي

لسه فيا كتير يتحب

و برغم كل ذنوبي

لسه في قلبي كلمة رب  

سيف مشاعره

 خبا عنها حقيقة مشاعره

لأنه خاف من بُعدها

عقله قاله وقتها

بيع مشاعرك و اشتريها

كان كل همه انه يراضيها

وهي حست وقتها

الدنيا وقفت ضدها

و سيف مشاعره بيكوي فيها

دنيا بحالها و سرها

تدي أحلام مش وقتها

يا حلم صعب نصدقه

صعب نعيشه / نحققه

يا دنيا ليه مستخسرة

ان الحبايب يلتقوا

في الوقت ليه متأخرة

ما كنش باقى

 ما كنش باقي غير خطوتين

و اعدي الجرح سنين قدام

رجعنا الشوق و الحنين

لحد مكان الجرح تمام

مش هين

 ما كنش بعاده بالهين

ولا قربه بالمرغوب

قضينا حياتنا هروب

م العيشة و العايشين

بشكر الظروف

 بشكر الظروف..

عشان جمعتني بيك

وبشكر الحروف..

عشان ساعدتني اوصف عنيك

وبشكر الحياة ..

علي ضحكة كانت تايهة مني

رغم احساسي اني

شخص مش مرغوب وجوده

اختلط بالزيف حدوده

و كيانه هاجم الانكسار

وجودك كان احسن قرار

قدر معاك يشتد عوده

تشعر الأحلام وجوده

الشمس تسطع فوق وروده

و ترتوي الايام أمان

سطور اوجاعى

 مشيت كام سطر في اوجاعي

لقيت القصة مش داعي

لكل دموعي في الوحدة

و الجهد المبذول ف خداعي

من البدايات للنهايات

 من حلاوة البدايات

لوجع النهايات

يا قلبي يفتح الله

قفلنا بابنا و قلوبنا

علي الف حيطة طالة

امل

 كان قلبي كل ما يدق أفرح

بحس ان الأمل جايز

و المتشعلق برحمة ربنا فايز

و العمر مهما طال او قصر زايل

ختم العاشق المخذول

 مختوم بختم العاشق المخذول

قلبي ال كان حاضن الدنيا بدراعه

مالقاش الحضن اللي يضمه

من غير ما يدوقه خداعه

وجهت شعرى ليك

 فجأة وجهت شَعري كله ليك

ماعرفش ليه قلبي شريك

مع ان بينا سور عميق

واصل حدوده للسما

وانا عاشقة تباشير الهوي

صوت الحنين بين الحروف

جويا خوف من اللي جاي

رافضة اكون مرسومة فيه

تحت الشجر و اتنين لمون

و رافضة اكون هامش بديل

مش فارق كتير جوه الرواية

ومش مرتاحة في غيابك

كل ما بكدب الكدبة بترجعلي

تَرجعلي حاجات مرت وانا وياك

فبلقي هناك مع ذكري كانت روحي

وكشف بوحي حنيني إليك

فك الزنازين

 قلبي اللي كان قافل علي حلمه

فتح البيبان و فكله الزنازين

ساع البراح و باقي شئ منه

يساع بدل المكان ميادين