نصيحة مًحب

يا عيون فرحها الحب
لكن بكاها النصيب
اطلبي من بكرة الحب
يمكن يقبلها النصيب 

من بعيد لبعيد

بتفرج من بعيد لبعيد

وبتابع عشته وحيد

وادعيله يكون فرحان

وايامه تقلب عيد

جوا منى

الحقيقة جوا مني ..

نبض بيحسسني اني ..

جوا مني نبض خايف 

جايز اكون جدا مش عارف 

بس احساس اني خايف ..

امتلكني ..

كلبش القلب في طريقه

فارد دراعه جوا مني .. 

قيد الحس في كياني

و المستغرباله رغم خوفي

حاسة حاجة جوا جوفي 

بتحرضني اني افرح

ايوه هفرح ..

بس هعيش انسان اناني

و هزم الحَزن اللي جالي

خلاني خايف اني افرح 

او حتي اصدق اني بفرح

‫

فوفوا بقى

 

يا خلق فوقوا بقي

طبع الخساسة زاد 

و الحق من الاموات

و الندل سعره غَلي

موزع الارزاق

يا موزع الارزاق 

قلبي من الضيقة ضاق

و الصبر حباله دابت 

زيد رزق السعد شوية 

و افرجها ع المشتاق

‬

عاش فشوش

انا قلبى لو كان عاش

فعاش فشوش ..

و ان كان لسه باقى له عيش

فــ الدنيا ما تسعهوش

  

كل حاجة

كل حاجة عملتها راحت بلاش 
كل فكرة شلتها لبكرة مجاش 
كل حاجة عرفتها ما عرفتهاش 
كل توقعاتي خسرتها ما شفتهاش

راعى خاطرى

كان نفسي بس تراعي خاطري
كان نفسي مهما يكون و حاصل 
يكون ما بينا من الاواصل 
اللي يشفع يوم ما بينا 

فتاح يا عليم

افتح دراعك للندي 
و اقصد كريم ..
فتاح يا عليم 
رزاق يا كريم 
يسعد صباحك 
ياللي انت مشتاق للندي

يشبهلك

بيشبه ملامحك 

و عقلك و روحك 

و زيك جميل 

بيشبه كتير 

لطيبتك .. حنانك

و زيك أصيل 

و بيحب ربه 

و خاشع و شاكر 

لفضله الجليل 

بيشبه لصوتك 

كلامك و جودك 

و بيحس قلبي 

ان انت جنبي 

و عمره ما شافه 

واحد بديل ..

اصل الضحكة

أصل الضحكة نسايا
تشوفك مرة تغمزلك
و تيجي التانية تتداري

سطور التاريخ

يا سطور في كتاب التاريخ 

افهمي ..

ان اللي مات ما كنش حلمه ينشهر

كان كل حلمه انك بحلمه

تَعلمي ..

ما كنش حلمه تختمي اسمه في سطورك

و تنعتيه بأسم الشهيد 

علي حلمه فيه تترحمي 

يا سطور تاريخ اتعلمي 

ان البشر اصل الحكاية

و ان الحقيقة..

مش صفحة ممكن تنطوي

او تتلوي او تنقطع

منقوع الصبر

منقوع الصبر في كاسات
موصوف لكل العاشقين
و المظلومين ..
و اللي كتير أوقات 
تحدفوا الدنيا بحاجات
ما عرفش ليه و ازاي و امتي
ما عرفش حتي ان كان ده حلم
ولا الحقيقة انه مات
ما شفش بكرة غير طشاش
يحلم و يعبي في قماش
دموع مالهاش من الاساس
غير انه معدود من البشر
كان كل طموحه يسيب اثر
او ينعتوه بوسام شرف
من غير قرف من الظروف
مكتوب عليه هيعيش حزين
خدام لكاس العاشقين و المظلومين
و هيقذفوه كل البشر ..
و السؤال محتوم اكيد ..
موصول بنسل الصالحين و الانبيا
ولا الذنوب فيك لا تغتفر ؟

خليك كريم

يا صٌبح هَل بخطوتك خليك كريم ..

و اديني من طيب الندي 

حبة أمل .. حبة هَنا

قلبي مٌناه كل المٌنييعيش سعيد

عتاب

عتبي عليك يا زمان 

ولا علي احبابي 

وفينا من غير تمن 

جرحوني أصحابي

و ايه تاني مخبية كده يا دنيا 
قبي و اظهري لينا 
مسحنا الدمع في عيونا 
تهزي الارض تحتينا !

رهان

براهن علي النصيب
جوايا الف من الاسباب
اللي تقدر تتغلب عليه
و توجهه لهدفي الوحيد

وقت السلام

ما عرفش ليه وقت السلام 
بيتولد جواك كلام 
مع ان نفسك تكتمه 
بتخرجه لوم مش هيام

عرفوه

عرفوه ..
ان قلبي و حياتي احتاجوه
مشتاقين يسمعوه
بيقول بحبك
و اصرخ بعلو صوتي
يا خلق هوووه
اسمعوه .. اسمعوه
اسمعوه بيقولي ايه
ايوه بشهدكم عليه
ليوم ما يبقي قلبه يقسي
فكروه كان بينا ايه
و حلفوه و حياة كلامه
سهر قلبي في ليل غرامه
ما يجني علي اللي كان ما بينا
و يغرقني في اهتمامه 

فهم متأحر

كالعادة بنتأخر
في فهم الدنيا و المسافات
كالعادة بنتمخطر
و نهدر وقتنا في حاجات
و نسال روحنا ليه احنا
و ليه بتهدنا ذلات
تضيع من عمرنا حلقة
ضحية لفهم متأخر

عشمان بالجنة

بتشعلق روحك بالجنة
و ذنوبك تهدم فـ جبال
عطشان متعشم فى المية
و مكسل تملا الفنجان

لوح ابلاكاش

بتلاقي روحك لوح ابلاكاش
من كتر المسمرة و الدق
و الرجة في مطبات
و الدقدقة ع الدَك
بيقصقصوك عاشق
و ينعتوك مجروح
و يلزقوك ع الحيط
او يعرضوك بفلوس
او يركنوك ارشيف
لوقت ليك عوزة
باعادة التصنيع
بيزيحوا في نقوشك
و ينقشوك ماليكان
و يجهزوك للعرض
ورا أزاز الفتارين
حَمال يا لوح الخشب
مظلوم يا ابلاكاش
الناس قلوبهم ورق
بيمرمطوك فـ تراك

ذنب السماحة

قلبي ما يستهلش توعده
و فـ ثانية ترجع تبعده
من غير اسباب ..
قلبي لو طيفك غاب
بيغني و يندب وحدته
كان ذنبه ايه من كل ده ؟!
ذنبه السماحة هدته

طيبة قلبى

وجعاني الطيبة اللي في قلبي
تعبانة من حسن الظن
لا انا مني بهدي ولا بكَن
و بصدق عديمين الدم

بالله عليك

بالله عليك يا صبح
لتكون فتحة أمل
و تَحن أوي علينا
دا احنا اللي خدنا الجَمل
قدوة .. لصبر عنينا

زهد البراح

المشكلة ..
مش في اللي كانوا
بيعشقوا ايام زمان
المشكلة في الـ انكسر فيا اوي
و ما بقاش يحس بالمكان
ما بقاش فيه حيل
انه يقدر من الظروف
احكام بتقطم في البشر
المشكلة في ذاتها مصير
مشروع كبير
و الربح حالة م الخذل
افكار بتيجي ..
افكار تروح ..
جواك طموح
ان الحكاية بتبدي
بتضيق اوي لجل البراح
بطعم زهده تهتدي

زمن العجايب

أحنا فى زمن العجايب
الحاضر ياريته غايب
و الغايب كأنه مات
و الحاضر و اللى اّت
ناصبين صوان لبكرة
و الماضى خلاص عدى
رميناه بكل ما فيه
النصر سموه نكسة
و الواطى بنمدح فيه
ايام بنعيش تفاصيلها
كارهين ان أحنا فَصيلها
كارهين نكون فاهمين

ظلم الشتا

ظلموا الشتا
سموه قاسي الطباع
مع انه حنين اوي زي الملاك
الرعد و البرق زعابيب انفجار
من كبت ظلم عشاق الصيف
والمطر دموع مشتاق لـ لمة الأحباب
والبرد والاعاصير زفير تنهيدة وجع
الشتا في مظاهره طباع عاشق
لكن للاسف موجوع
الشتا بيعلم الحبايب
فن الدفا في حضن الحبيب
و يمحي فرق المسافات الهاشة
بيغسل بالمطر غبار الزمن و علاماته
مدرسة بتمحي امية الغلابة بدون عَلام

حضن ام

لفيت كتير ..
و قابلت ألف من الحاجات
الحاجة منهم تكسرك
مالقتش فـ الدنيا دى أصعب
من الاشتياق لحضن ام

دفتر شعر

الشعر ..
دفتر المليون وجع
الف دمعة علي سهوة
ختم الاحساس لقلبك
فن الصانعة و الاتيكيت
الشعر ..
باب مفتوح للوصف
و المعني ..
تجسيد لكل الاخيلة
رسم المكان ..
تفريغ الفرح و المعاناة

دعا المطر

وقت المطر
يحلي الدعاء
الباب مفتوح
لدعوة روح
بتناجي خالقها
ثقتها فـ الإجابة
يطيب خاطرها
يريح فـ بالها
و تأمن مكانها
و يحلي البوح

ست البنات

بيشوفها الكبيرة
العاقلة الرزينة
و ست البنات
شقاوة فرحها
و رقة و جعها
و ضحك بعياط
و شافها الجريئة
و شافها البريئة
فـ هَمس العيال
بتعند و ترخي
بتكره و تدي
عشق فـ سكات
يا غالية و اميرة
دا عاشق بقلبه
و غلبه السكٌات
دا فيض المشاعر
و وزن القصايد
لَجم لسانه ..
و كأنه مات
مفتح عيونه
و رمشة جفونه
صايبها الثبات
يا ست البنات
ده عاشق لساسه
و عارف خَلاصه
و عقله في راسه
و قاله انه حبك
فـ شايفك اميرة
ومايصة و رزينة
و ست البنات