وشوش مُقنًعة

سقط القناع
بانت وشوش
بالطيبة ظاهرة
والدناوة في طبعها
اظهر وبان
يرحم زمان
ايام ما كنا مصدقين
ان انت واحد مننا
وطلعت واحد خَمنا

مؤمنة

زَين إيمانها وشها
ببسمة أمل
ونبضة حياة
خَلي النهاية المحتمة
تبشير آله
تنهيدة الصبر في ضلوعها
تَغْنيها عن كل البشر
مش طالبة غير عفو الآله

خدام الهدف

فات الكتير
والباقى أخطر من الخطير
لكن اكيد فرجه قريب
هتلاقى فى الكون معجزة
فأثبت اوى خليك قوى
حَضر ستاير الحلم قدامك لَفف
دقق اوى فى المعطيات
و أخدم موازين الهدف
ذاكر أوى .. كرر وعيد
أياك تحيد عن حلم جواك وأتهزم
جرب كمان ..لسه أحتمال
تتحقق المعجزة
ده مش بعيد

هستريا

هو انا بضحك عشان فرحان
ولا ضحكي دا هستريا ؟
دموعي عشان زعلان
ولا احنا عالم نكدية ؟
كل حاجة ناقصة سبب
كل حاجة من غير حساب
قالوا الضحك من غير سبب
صاحبه في الأدب مٌعاب
انا ليا دمعة وليا ضحكة
مجهولة عندها الاسباب

اليأس خيانة

اليأس خيانة
والأحباط مَذلة
الحزن حالة
هتاخد وقتها بينا
والوطن باقي
وانا واللي باقي وقتها مَنا
هنزرع أرضها جنة
والثورة حاكمة بأمرها بينا
الدولة مش هتقوم بظالم
ولا هيحيها ضعفنا ونومنا

كله مُدان

خايفة انام
أصحى الآقى مليونين
جرحى ولا مقتولين
والشوارع فيها دم
والجوامع تستغيث
اغثنا يا مغيث
والصريخ فى كل حتة
والدعا ع الظالمين
واللى عايز يستخبى
فى ضل حيطة مَ الكمين
واللى مش لاقى حبيبه
والــ بيشيل ميتين
خونة ولا كافرين
الــ مات علينا حقه
الحساب فى يوم الدين
مش هيفرق بيت الاَّمر
مش هيعفى مأمورين
كلنا أصبح مُدان
والــ مات هو المَدين

ازى الحال

يا مفوضين .. ايه
نمتوا حلو ومرتحين
فرحانيين وشمتانين
طب كل عام وانتم بخير
والضحايا بين رقابكوا مشعلقين
والضمير بقي فيكو عيرة
والدم في عيونكم عصير

الشماتة مش فى دين

ياللى شمتان فى اللى ماتوا
الشماتة مش في دين
النهاردة هما ماتوا
واحنا بكرة ميتين

ما حستوش

مش عارفة ليه ..
ما بشوفش صورتي في اشعارك
قلبي اختارك ..
بس انت لسه ما حستوش

يا مجيب

يا مجيب استجب
يا عالم بحالي كتير
بدعيك انا المشتاق
لعطرك الخلاق
بدعيك وانا صايم
ترفع عنا مظالم
الخلق حولينا
وتهدينا وتحسبنا
من العٌتقاء ..
بدعيك وانا ساجد
بخشوعي في المساجد
تملا طريقي خير
تهديني للجنة
يا ارحم الراحمين