هروب النوم

النوم صديق هربان
مَل الشوق فـ عيوني
والقلب صبح إدمان
يسهر الليل مجروح
عاشق حلاوة الروح
والنخذ في ضلوعي

وحيد ونسان

وحدي لكن ونسان بطيفك النادي
فاكر ليالي زمان وعليها بينادي
يا تري اللي كان حلم وغزا فؤادي
ولا الحنين شارد لنفسي بيعادي

حالة حقيقية

ضيعت نص عمرك مستنى الحبيب
و النص التانى ضاع بتدور عليه
لأ زمن الحبيب نـَصـفـك
ولا هَـان عـلـيـك تَـخـلـعـه !

:

طائر مان

انا ما بحبش باسم يوسف
وبكره الأخوان
ما شفتش ارب ايدل
ومسلسل الكبير كمان

بتمرد ع الوضع الحالى
مش بتمرد ع الأخوان
بتجرد من كل فلولى
وطنى بينقذ او عَلان
انا ما كتبش شعرى فصاحة
كان أحساسى وكان يا ما كان
ما جمالتش ابدا حد برأيى
حتى ان كان سيد روزمان

على اد دماغى وفكر مشاعرى
بأقدر أوزن بالأوزان
فما تحكمش عليا بعقلك
عقلى لوحده طائر مان

احتياج

انا ما بقتش محتاجة
لروح الكدب في كلامك
انا دلوقتي محتاجة
اكون ملكة ف احلامك
انا ما بقاش يكفيني
كلام بالساعة لقمرنا
انا عايزة اكون نايمة
افتح عيني بصالك
ولو مشغول اكون جنبك
اساعد نبت افكارك
انا لو شق قلبي الليل
يبات للصبح يندهلك
ولو غمض عنيا النوم
صوتي في حلمي يندهلك
ولو سرحانة اشوف صورتك
ولو بحكي بقي في سيرتك
ولو عيني ملاها دموع
تكون مشتاقة لعيونك
انا ما بقتش محتاجة
لكلمة شعر في قصيدة
انا بحتاج لتنهيدة
تجمع شمل أحلامنا

شعرى حبيبى

ما فيش احسن من الشعر
الشعر حبيبى بيفهمنى
لا يوم ظلمني
ولا يوم جرحني
الشعر بيداوي جروحي
فاهم نوحي
صاحبى وحاسس اوجاعى
لو مرة اديتله دراعي
ترجع متشالة بورد قاري افكاري وحواريها
احساسي ده منبع طيبته
شعري بيتجسد من روحي
وبنبضي بيحس الفكرة
لو افرح يلمع بحروفه
والنقطة علي الحرف ديه نجمة
لو احزن
يسيل الحبر في كتابها
زمان انا كنت غاوي بٌكي
دلوقتي شعري هداني
الخطوة بتساوي الفكرة
والفكرة تبنيلي البيت
والبيت بيجر البيت
تبقالي احلي قصيدة
فكرة وبيت عنوانهم مني
وديواني اسمه حياة

مشروع ضحكة

الضحكة فى رسمتها
بقت محتاجة مشروع
توسيع الشق بين الشفايف
بقى اختراع/ مشكلة/ موضوع
ويا خوفى م الضريبة
والهروب منها ممنوع
الضحكة فى تأويلها رواية
يرويها العاشق للمعشوق
العابد لرب كريم
وقالولها فى الدواوين
موصوفة لراحة البال
وهنياله فاعل الخير والثواب
ينشرها فى وشوش الناس
تطرح امل وخير وحياة
والفقير بقى فى معناه
فاقد الشق بين الشايف
والغنى هو اللى عنده
فى الشق اتساع
الضحك دلوقتى مش معناها
انك فرحان او غنى
معناها شَقى
معناها فقير !!