غفير القصر

مش هكتب شعر
وأعلق ورقة بأنى بغير
مش هفضل عايشة فى قصة
وحبك وهم كبير
مش هفضل أدأدى وأهاتى
وقول معلش الصبر جميل
وأنا شايفة بعندك ليا
بترسم سكة لفُرقة وبعد خطير
أنا أيوه بسامح
بديك فرصة للتغير
ولا معنى ده أنى أثيرة
فى حضن بخيل
ولا أنى هافية
قليلة العقل والتفكير
دا أنا صورتى لحبك
أسرة وعيلة وضلة وخير
هديلك وقتك فى التفكير
ويا هــ نبنى القصر
لَــ هنبقى على أبوابه غفير

رواية عشق

كل يوم الجرح يكبر
عن الــ قبله
كل يوم الدمع يتنفس اّهات
زايدة حمولى وقلبى عنده
نبضه يصرخ من سكات
مهما قولنا ومهما عدنا 
  قلبى مش فارق كتير
مع انه حبك وبضمير
قلبى مش محتاج لنبضه
وعمرك ما هتبقى الأخير
ومش هكون إنسان ذليل
يعشق الطعن فى حياته
ويسميك حبه الكبير
مش مهم انت فوقت
المهم انى صحيت
مش هعشلك وانت راضى
انغمس فـــ سواد الليل

حلى شعرك

حلى شعرك فوق كتفاك
طايرى الزاجل حمام

غصنك اخضر حضنى دافى

عيشى عيشة  الأبتسام

تـصـفا جـواكـى الـحـيـاة

ضـمـى نفسك وأحضنيها
حسسيها بالأمان

وملسى شَِعرك كمان
ريحى الـشاغل فـ بالك

وأفـتـحى كـل الـبـابـان
طلعى الكامن فــ قلبك
وأفردى الصناديق أوام

ريحى فكرك سبيه

يلقى فى الداخل إمام

شمس ملامحك

ياللى التلج غطى ملامحك
شمس الحلم هتشرق تانى
تحت شعاع نورها هتدفا
افرش خيوط حلمك / اتوصى
واعزف لحنك يشبه صوتك
غَرد/ بَلبَل / زقزق/ طير
حركة روح الطير جواك
تجعل لمسة جسمك طاقة
فوت ببساطة
كسر سور التلج محاوطك
دفى الكون بلهيب خطوايك
ارسم شكل خريطة لفرحك
شمس ملامحك تشرق ليك

قانون الحياة

كل الضحكة ما تبقى كبيرة

بتقلب دمع

كل ما قلبك يكبر اكتر

يشيل فـ الهم

وكل ما زادت خفة دمك

كل ما كان أحمال جواك

وكل ما يعلى الحق ف صوتك

كل ما يكبتوا حسك فيك

بؤجة الحلم

لملم يا حلم فى بؤجتك
وأرحل بيعيد
صوت النواح فى محبته
صابح عنيد
كل لما أشيلك من ألم
يظهر جديد 
  حلمى الوحيد
حلمى العتيد
لساك بعيد
لسه النصيب رافض تكون
ليا أنا
لسه الخطاوى بميت
مليووووون سنة
حظى أنا
حمدا عليه
وشاكرة ربنا

صورة الهجر

لسه قلبى كل ما يعشق
يعشق وبزيادة
ولو يوم كوانى
يرمنى كالعادة

ولسه فـ كلامه الرجا
بيتوسل لرجوعها
ولو شمع عمرى ضوا
ديه فـ عينه وف طوعها  

وبرضه الحنين منصوب
وواقف لى سداده
حالف بعمره ما أتوب
وكاسرنى كـ إزازة

كل حروفى صبحت علة
رافضة تكتب شعرها ليك
كل ما تكتب حب تلاقى
صورة الهجر لايقة عليك

/LilianFlower/RyhamAhmd

شوكة وريحان

كان قلبى حاطط
فرقتك أقوى أحتمال
وكان من المحال
انه يغادر سكتك
زى أحتمال المر
فى منقوع العسل
شهد وبصل
شوكة وريحان

لحاف قلبك

انا جوه لحاف قلبك بدفا

قلبى بيصفى 

كتر الأحلام جنبك غية

وانا وعنيا

 اوى مش بنام

من كتر التفكير فى حلاوتك

كتر غلاوتك

 مش اى كلام

العين بتنام قلبها يصحى

وبيتنهد ويقول يا سلام

وبيشتاق لعنيك الحلوة

بنفس الغنوة يسهر ما ينام

سر الأفراط فى سعادتى
وسر حلاوتى بيتفسر بيك
لجناب معاليك

 يسهر ما ينام

أزاز العشق

كل حنينى متلغبط
وبيخبط
جدار الشوق
ازاز العشق عورنى
بسن الشوق وهمساته
و لو يوم الربيع فاته
يموت من الخوف
و كل فصولى محنية
و ملهيّة بعشق يضيف
لقلبى يشق بسماته
يزيح الخوف
يشيل ويدادى دقاته
ولما يغيب
يزيد من رش ورداته
يفوح العطر
يهز فى قلبى حركاته
ويجنى الشوق
وبحلف ألف وحياته
ما عمرى اغيب
ولا تبقى لغيرى فـ يوم
كتاباته ..

حجاب العشق

يا بت يا سمرا

يا أم العنين

متلونين بلون الدهب

بيقولوا يا سمرا

الشوق فى عشقك لهب

وانا بدى منك اجى واتعلم

لجل الحبيب ما يجى ويسلم

وبــ توب حرير وقرطين الدهب

يروح لأبويا ويطفى نار اللهب

يا بت يا سمرا

دوقى لى دقة زار

لفى حجاب العشق

يربطنى بــ حبيبى

واتوصى يا سمرا

دمعى فى مكاتيبى

وقلبه يا سمرا

لساته ما دارى بى

يا بت يا سمرا

لفى الحجاب معقود

ما يفكه جان ولا حتى

شيخ كركوب