وقت المطر

 وقت المطر باب السما مفتوح

دمعي اللي نازل بوح

بوجعي و دُعايا يكون معايا

ما يفرقنا حتي الموت

صدفة وحشانى

 اكيد الصدفة وحشاني

كانت لما بشتاقلك

تجَمع شملنا تاني

ولما سلامنا يسرقنا

و بعد خطوة في فراقنا

ندعي بصدفة تجمعنا

و قد الشوق ما يوجعنا

تيجي الذكري تخدعنا

تصبرنا علي الاوجاع

فى قلبى حنين

 في قلبي حنين محيرني

يفارق ولا يسكني

صاحب دمعة في عيوني

وكل ما يجي يوجعني

معادن دهب

 أنا قلبي واقف مطرحه

مستني روحك تعشقه

و يدوبوا في التفاصيل

معادن دهب و قابلة للتشكيل

حب مش مفهوم

 بحبك حب مش مفهوم

لا ببقي معاك ولا شيفاك

ولا حاسة ان بينا شعور

اماني معاك و بستناك

ليالي طوال

بقول خايفة و انا عارفة

انه مش معقول

يكون بينا غرام و بقول

شيطاني همه يجرحني

و اريحلي ما كنش حضور

وابعد ليلة و التانية يرجعني

حنين مغرور

بتحجج بكام كدبة و اقول مشغول

ما انا خوفي بيجبرني الف و ادور

واه من غيرة وجعاني و منعاني

اروح لبعيد

لا انا مرتاح ومش برتاح

و مش نافع

اقول و اعيد

كلام بالساعة لقدرنا يقدرنا

ويخلف وعده واتحير واروح لبعيد

ومن تاني حنيني يجبني بالاشواق

نرجع تاني للحيرة مع الغيرة

أخرنا فراق

يا قلبي اسمعني يا تفارق

يا تكتبني من العشاق

بخت عيني

 غصب عني لقيت دُعايا

ربنا يجمعني بيك ..

بخت قلبي انه شريك

وبخت عيني تبات مشتاقة

حرف تايه

 كتبتك حرف تايه من غير نقط

محتاج وليف يونس وحدته

بكلمته عن الشوق و الهوي

يملا فراغ الشقوق في قلبك

و بضحكة تنشر رذاذ النقط

تملا الحروف الناقصة في عيونك

وتبان الرؤية واضحة بعد ما كنت كفيف

تسطع شمس الربيع في قلبك وتخلع توب الشتا

وتحل زقزقة العصافير محل الحزن و دموعك

تعريف للشعر

 الشَعر ايه ..

غير حُضن دافي في حضرتك

سَيلان دموع .. يشفي العليل

ضغوط كتير .. فيضان مشاعر

وقلبي اللي لاوع وحدته

مابقاش قوي

ما بقاش حويط

فكل ما تيجي سيرتك يكتبك

او يرسمك ..

قلب متوحط بدراعين

و دموع حنين و ضحكة ندم

زقزق يا حلم

 زقزق يا حلم و رن بخطوتك

دا انا فرحتك وحشاني و الله من سنين

طبطب و ميل و اشفي العليل

مشتاق و نفسه في ضمتك

دقة ناقصة

 يا دقة ناقصة طاوعيني

هجيلك و انتي هتجيني

هتكمل حاجة نقصاني

واياك بعودة تفارقيني

طبع الزمن

 طبع الزمن تجاعيد

كل اما زاد زادوا

و الطبع فيه غلاب

لما بقا عادة

طبع الزمن قاسي

علي اللي بيآسي

سايب سيوف هَمه

تجرح ولا تواسي

تجاعيده دى مفارق

لكل شئ فارق

ليه يخلف المواعيد

وانا لسه ليه رايد

الدنيا سَتارة

وعيونها جبارة

باين عليها الوجع

و الضحكة محتارة