شك و غيرة

يلعن الشك و الغيرة
وكل لحظة حيرة
قتلت ضحكة مفروشة
و ردمت كل طريق الورد

ضحكة أفيش

الضحكة ديه مش من مافيش
الضحكة ديه تنفع افيش
لقلب خمران من الزمن
الضحكة ديه بدل الندم
..

الضحكة ديه بستان امل
زارع وروده للحياة
بينقي في الظاهر هواه
لكنه مشواره من ألم

بكرة أحلى

بيقولوا بكرة احلي
ويجي بكرة و ما يحلي
و يجي بكرة و برضه عادي
يجي تاني و تتغير ملامحنا
و لسه احنا زي ما احنا
و لسه بكرة برضه عادي

احتياج

كتير بنحتاج لايد تطبطب
قلب يرطب علينا الحياة
و ضحكة شقية من غير سبب
و صاحب وقت ما نحتاجه نلقاه

قلب منقوش بالزمن

كتر الألم ..

بيشبع القلب الحزين 

و بيبعده عن فرحته 

وتخلق مسافات السنين 

مية الف حاجز في الطريق

بتمنع الفرحة الاكيد 

اللي اتمناها من زمن 

و التجربة..

ديه فعل فاضح في الطريق 

شوه الفرحة معاه 

حتي المعاني المفرطة 

ما بتغيرش الاتجاه 

محفور يا اسفلت الطريق 

بحكاوي الماضي البرئ

الذكري ديه حفار قوي 

بيغمر القلب القوي 

و يغلفه بعفر السنين 

مشوار طويل ..

هتكمله ازاي و فين 

و كل ادواتك يا عين 

قلب منقوش بالزمن 

متوزعة القسمة

مش كل اللي بيضحك فرحان

ولا كل اللي يكتب في الهوي عشقان

ولا اللي يٌملك صحة .. يٌملك مال

متوزعة القسمة بين غني و غلبان

دعوة مطر

وقت المطر 

يحلي الدعاء

الباب مفتوح

لدعوة روح 

بتناجي خالقها 

ثقتها فـ الإجابة 

يطيب خاطرها

يريح فـ بالها 

و تأمن مكانها 

و يحلي البوح

اعلان هام

بحلم بوش

ما فيهوش تجاعيد الزعل !

وان كان لابد من الزعل

مطلوب حبيب يطيب دمعتي

ممكن قَريب ..

المهم انه يُجيد

مَحي الدموع من وحدتي

اقبى يا دنيا

و ايه تاني مخبية كده يا دنيا 

قبي و اظهري لينا 

مسحنا الدمع في عيونا 

تهزي الارض تحتينا !

ارحمنا يا بيه

ارحمنا يا بيه الله يخليك

ديه الدنيا ياما لعبت بينا

نتشال .. نتحط بين زنقة و حيط

نتنفس تيجي تمسك فيا 

يا جدع

حيرني امرك يا جدع 

يوم بتكون جدع 

و ساعات بشوف الودع 

لجل أعرف انت مين 

غلطة عمرى

و أدي اخرتها .. غلطة عمره

بعد حنيني و بعد بكايا..

بعد ليالي كتير اقضتها

بدعي بدمعي يبقي معايا 

و حلمي بطفل بيكبر بينا 

و بيت يجمعنا .. و ان الفرحة تبقي معانا

يجي علي حلمي بكلمة يشاور

غلطة عمري ..!