اكتبلها

اكتبلها

بالحبر جود حبها
وأرشقلها
فصوص ياقوت على قلبها
فى سلسلة

 تتحط جنب نبضها
يفضحلها
بسر نبض حبها
وأرسملها
ورود كتير على وشها
ترسم ملامح سعدها  
واوصفلها
حياة جديدة جنبها
وبحرف اسمك جنب حرف اسمها
تكتب حكاوى عنها
واختم بنهاية تليق بها
بدعوة الناس كلها
لحفل يتوج حُسنها
أميرة ملكة عرشها

خططلها
ايام سعيدة لعمرها

واحفظلها
صور ليلاتى لشخصها

دون لها
فى كتاب حروفه من دهب

شعر وقصة عشقها

يفضلها
ذكرى جميلة من لهب

تشعل قصايد منها

هى شايفة

هى شايفة ..
لهفة جوة عنيك
هى سامعة ..
نبض قلبك
هى حاسة ..
كل همسة
كل ضحكة
فوق جبينك
بس خايفة
تخون وتنسى
اصل قالوا
الغدر اخرة
الطيبين
عايزة منك
كلمة حلوة
ولا غنوة
مشتاقين
هى كانت
شمس طالعة
بس غابت
من دموعها
خدها واعلى
يحلى بكرة
وتبقى ذكرى
كل فكرة
اّه وفين

السلم والتعبان

السلم والتعبان
لعبة بقالها زمان
موزونة بالميزان
بيلعبها الاخوان
والعسكر حوالينا
واللعب على الميدان
واللى هيسقط فينا
والرَك ع اللى مال
ناحية الأمان
ونَسى انه اتهان
وشفيق ما شفق علينا
وربنا أعلم بينا
كل ما نطلع سلم
تعبان ينزل بينا

حطانه الورق

رسمت ع حطانه الورق
قلب وشجر
وعصرت لمون كاس الهوى
وركزت مــ العشق كاسه
ريقه ارتوى
شق الورق
وقع العصير يروى الشجر
وقلبها ما ارتوى !!

افـتـح قـلـبـك

تبعد ليه عن ناس عشقوك
هما حبايبك بيغشوك
ولا هواك فى الاصل أنانى
بتخبى فـ عنيك الشوق
وأنا من خوفى لتبقى أنانى
ببعد عنك وارجع تانى
زى حكاية فى الحواديت
اصل هوايا معاك مجنون 
عمر ما قلبى عليك هيهون
افتح قلبك ..اشرح... قول

ترجم كل كلامك شعر
يوقف نزلة اى دموع